**ഇന്ന് നിങ്ങളുടെ ജീവിതത്തിലെ ഒരു സുന്ദരദിവസമാകട്ടെ.. **

Tuesday, September 30, 2014

എന്നാലും എന്‍റെ തലപ്പാവേ,,,,,,



വിദ്യാധരന്‍റെ വ്യാകുലചിന്തകള്‍
  കേന്ദ്ര ആഭ്യന്തരമന്ത്രിയെ ഒരു പാവം മലയാളികൊലയാളി തലപ്പാവ് അണിയിച്ചത് വലിയ വിവാദമായിരിക്കുകയാണ്.. തലപ്പാവ് അണിയിച്ച ആള്‍ ഒരു കൊലപാതകകേസിലെ ഒന്നാം പ്രതിയാണെന്നാണ് പോലീസും നാട്ടുകാരും പറയുന്നത്... ചിലര്‍ ഇപ്പോഴും അതിനെക്കുറിച്ച് പഠിച്ചു കൊണ്ടിരിക്കുകയാണ്; അടുത്ത കാലത്തൊന്നും പഠനം തീരാന്‍ സാദ്ധ്യതയില്ലാത്തതിനാല്‍ അവിടെനിന്നും അഭിപ്രായമൊന്നും പ്രതീക്ഷിക്കേണ്ട.. കേന്ദ്ര ആഭ്യന്തരമന്ത്രി കേരളത്തില്‍ വന്നതുതന്നെ ഒരു കൊലപാതകകേസില്‍ അനുശോചനം അറിയിക്കാനും, അതിന്‍റെ അന്വേഷണം വേഗത്തിലാക്കാനുമാണ്. അപ്പോളാണ്  മറ്റൊരു കൊലക്കേസ് പ്രതി അദേഹത്തെ തലപ്പാവ് അണിയിക്കുന്നത്... അത് മോശമായിപ്പോയിയെന്നൊരു വിഭാഗം പറയുന്നു. അല്ല ആ ചെയ്തതില്‍ ഒരു കുഴപ്പവുമില്ലെന്നു മറ്റൊരു വിഭാഗവും പറയുന്നു. ഇപ്പോള്‍ അതാണ്‌ ഫാഷന്‍പോലും . പണ്ടൊക്കെ ചെറിയ കുട്ടികള്‍ മന്ത്രിമാര്‍ക്ക് ബൊക്ക നല്‍കി സ്വീകരിക്കലായിരുന്നു രീതി... പിന്നിടത് കസവുചുറ്റിയ തരുണിമണികളുടെ പുഷ്പ വൃഷ്ടിയോടെയായി.. അതും ഓള്‍ഡ്‌ ഫാഷനായി.. ന്യൂ ജനറേഷന്‍ രീതിയനുസരിച്ച് ആഭ്യന്തരമന്ത്രിക്ക് മാല യിടുന്നത് മിനിമം ഒരു കൊലപാതകക്കേസിലെ ഒന്നാംപ്രതി തന്നെയാകണം.. അതേ ഇവിടെ നടന്നോള്ളൂ.. അത്രേള്ളൂ..... അതിനാണ് ഈ കണ്ട പുകിലെല്ലാം..
  തലപ്പാവ്  വിഷയത്തില്‍ കേരളപോലീസിനു ഒന്നും ചെയ്യാനില്ലയെന്നും ചെയ്യേണ്ടതു മുഴുവന്‍ എന്‍.എസ്.ജി ആണെന്നും പതിവ് പോലെ കേരള ആഭ്യന്തരന്‍ പറഞ്ഞിട്ടുണ്ട്.. അല്ലേലും മന്ത്രിമാരുടെ പരിപാടിയില്‍ ഈച്ച യാട്ടുന്ന പരിപാടിയെ പോലിസിനുള്ളൂവെന്നു ആര്‍ക്കാണ് അറിയാത്തത്... ഈ സംഭവം അങ്ങേയറ്റം മ്ലേച്ചമാണെന്നു പ്രതിപക്ഷം പറഞ്ഞിട്ടുണ്ട്... കൊലക്കേസ് പ്രതികളെ ഏതെങ്കിലും പാര്‍ട്ടി ഗ്രാമങ്ങളില്‍ ചിക്കനും വാറ്റും കൊടുത്ത് പാര്‍പ്പിക്കലാണ് ശരിയായ രീതിയെന്നാണ് അവരുടെ നിലപാട്... എന്നാല്‍ കൊലക്കേസ് പ്രതികള്‍ ജനമദ്ധ്യത്തില്‍ പരസ്യമായി സഞ്ചരിച്ച് തലപ്പാവും ഷാളും അണിയിക്കെണ്ടവരാണെന്നാണ് പ്രതിയുടെ പാര്‍ട്ടിക്കാര്‍ പറയുന്നത്.. ആകെ മൊത്തം ബഹളം.. ഇതിനിടയില്‍ ഗ്യാസ് സിലണ്ടര്‍ പന്ത്രണ്ടില്‍നിന്നും ഒന്‍പതാക്കാന്‍ തീരുമാനിച്ചത് ആരുമറിഞ്ഞില്ല... ടാക്സി നിരക്ക് കൂട്ടിയത് ആരുമറിഞ്ഞില്ല... ഒരു കണക്കിന് നോക്കിയാല്‍ ഈ തലപ്പാവ് ധരിപ്പിക്കലൊന്നും  ഒരു സംഭവമേയല്ലെന്ന നിലപാടാണ് സമ്മതിക്കേണ്ടത്...  ജനപ്രതിനിധികളില്‍ നല്ലൊരു ഭാഗവും കൊലപാതകം ബലാല്‍സംഗം തുടങ്ങിയുടെ ഉസ്താദ്മാരായിരികുമ്പോള്‍ കേവലം ‘ഒരു’ കൊലപതാകക്കേസില്‍ മാത്രം ഒന്നാം പ്രതിയായിട്ടുള്ള ഒരു നിഷ്കളങ്ക യുവാവ്; മന്ത്രിയെ  തലപ്പാവ് അണിയിച്ചതിലെന്താണ് കുഴപ്പമെന്നുള്ളതാണ് കാലികമായ ചോദ്യം.. അതിനോടൊപ്പം ഉയരുന്ന മറ്റു ചോദ്യങ്ങള്‍ ഇവയാണ്.... പ്രതിയുടെ മനുഷ്യാവകാശത്തിനു ഇവിടെ ഒരു വിലയുമില്ലെ..?. അയാള്‍ക്കുമില്ലേ മോഹങ്ങളും ആഗ്രഹങ്ങളും..??. സത്യത്തില്‍ പ്രതി എന്നതു തന്നെ പോലീസും മാധ്യമങ്ങളും ചേര്‍ന്ന്‍ രൂപപ്പെടുത്ത ഒരു സങ്കല്‍പമല്ലെ.?? കോടതി ശിക്ഷിക്കാത്ത കാലത്തോളും ഒരാള്‍ പ്രതിയാകുന്നതെങ്ങനെ.???. HOW IS IT YOUR OWNER …….. ഈ ലാ പോയിന്റ് നന്നായി പഠിച്ച ശേഷമാണ് ടിയാനെ തലപ്പാവ് അണിയിക്കാന്‍ വിട്ടത്.. ഇതൊന്നും ഇവിടുത്തെ ഫൂള്‍സിനുമറിഞ്ഞുകൂടാ... മാത്രമല്ല വിവരമില്ലാത്ത ചിലര്‍ ഒരു പടികൂടികടന്ന് കേരളാപോലിസിനെയും വിമര്‍ശിച്ചു കളഞ്ഞു... കൊലപാതകി മാലയിട്ടെങ്കില്‍  അത്  മന്ത്രിയും എന്‍.എസ്.ജി യും സമ്മതിച്ചാല്‍ മാത്രമേ നടക്കത്തൊള്ളൂ.. മന്ത്രിക്ക് ചുറ്റും എന്‍ .എസ് .ജി വട്ടമിട്ടു പറക്കുമ്പോള്‍ കോളാമ്പിയും ചെല്ലവുമായി പിറകെ നടക്കലാണ് നമ്മുടെ പോലീസിന്‍റെ പണി... കൊലപാതക കേസിലെ പ്രതി മന്ത്രിക്ക് മുത്തം കൊടുത്താലും കണ്ണടച്ചു നിന്നുകൊള്ളണം.. അതാണ്‌ ഓഡര്‍.. തിണ്ണമിടുക്ക് കാട്ടാന്‍ നമുക്ക് വേറെയെത്ര വേദികിടക്കുന്നു...  ഇവിടെ കൊലപാതകിയുടെ ചന്തി കഴുകിയ അതേ പോലിസ് തന്നെയാണ് ; മോഷണകുറ്റം ആരോപിക്കപ്പെട്ട സ്ത്രീയുടെ നട്ടെല്ല് തകര്‍ത്തുകൊണ്ട് മിടുക്ക് കാട്ടിയത് .അതുകൊണ്ട് പോലിസ് ഒന്നും ചെയ്യുന്നില്ലായെന്നു മാത്രം പറയുയരുത്.. തിരിച്ചു തല്ലുകിട്ടില്ലായെന്നു ഉറപ്പുള്ള ആരെയും തല്ലും കസ്റ്റഡിയിലെടുക്കും... സോളാര്‍ തട്ടിപ്പുകേസില്‍ പ്രതിയായ സ്ത്രീയുടെ  മനുഷ്യാവകാശം സംരക്ഷിച്ച അതേ പോലിസ് തന്നെയാണ് മോഷണക്കുറ്റം ആരോപിക്കപ്പെട്ട സ്ത്രീയുടെ നട്ടെല്ല് തകര്‍ത്തത് ...അതാണ് നമ്മുടെ പോലിസ് ലൈന്‍... അതുകൊണ്ട് ഇതൊന്നും വല്യ ഇഷ്യൂ ആക്കെണ്ടാ...
 ഈ തലപ്പാവും പൊക്കിപ്പിടിച്ച് നടക്കുന്ന കേരളത്തിലെ ഫ്രീക്കന്മാര്‍ക്കൊന്നും വേറെ ഒരു പണിയുമില്ലേയെന്നാണ് ചില കോണില്‍നിന്നും ഉയരുന്ന മറ്റൊരു ചോദ്യം. പണ്ട് മരിയഷറപ്പോവ ഏതോ ഇന്റെര്‍വ്യൂവില്‍  സച്ചിനെ അറിയില്ലായെന്നു പറഞ്ഞതില്‍ പ്രതിഷേധിച്ച് നാട്ടിലും വീട്ടിലും നടന്ന  എല്ലാ പ്രശ്നങ്ങളും മറന്ന്‍ അവരുടെ ഫേസ്ബുക്ക്പേജില്‍ പോയി മലയാളത്തില്‍ തെറിയഭിഷേകം നടത്തി ഉദ്ബുദ്ധത കാട്ടിയവാരാണ് നമ്മള്‍ മലയാളികള്‍.. അങ്ങനെയുള്ള നമ്മള്‍ ഇന്നിപ്പോള്‍ ഈ തലപ്പാവ് പ്രശ്നത്തെക്കാള്‍ വലിയ പ്രാധാന്യം കൊടുക്കേണ്ടത്  മംഗള്‍യാന്‍ എന്താണെന്ന് അറിയില്ലായെന്നു പറഞ്ഞ കരീന കപൂറിന്‍റെ അഭിപ്രായത്തിനല്ലേ..  അവരെ തെറിപറയാന്‍ പോകാതെ ഇവിടെ എല്ലാവനും തലപ്പാവുംപ്പൊക്കിപ്പിടിച്ച് നടക്കുന്നതില്‍ എന്തോ ഗൂഡാലോചനയുണ്ട് അതിനും ഒരു സി ബി ഐ അന്വേഷണം വേണമെന്നാണ് എന്‍റെ നിലപാട്.....
കൊന്നവനും കൊല്ലിച്ചവനും രക്തംപുരണ്ട കൈകൊണ്ടു അണിയിക്കുന്ന തലപ്പാവിനും  ഷാളിനുമൊക്കെ ഉത്തരവാദപ്പെട്ട ഒരു മന്ത്രി ശിരസ്സ്‌ കുനിക്കുമ്പോള്‍ നമ്മുടെ ജനാധിപത്യം എത്രയോ അപകടാവസ്ഥയിലായി കഴിഞ്ഞുവെന്നാണ് കരുതേണ്ടത്... അക്രമികള്‍ അരങ്ങു വാഴുമ്പോള്‍ സാധാരണക്കാരന്‍ കര്‍ട്ടനുപിന്നില്‍ ഒളിക്കാന്‍ നിര്‍ബന്ധിതനാക്കപ്പെടുന്നു... കതിരൂരിലും തിരുവനന്തപുരത്തുമൊക്കെ വെട്ടി വീഴ്ത്തപ്പെട്ടവരെ ഒരേ കണ്ണിലൂടെ കാണാനാണ് ഒരു മന്ത്രി ശ്രമിക്കേണ്ടത്... കൊലപാതകങ്ങള്‍ ആവര്‍ത്തിക്കാതിരിക്കാന്‍ കൊലയാളികള്‍ക്കെതിരെ മുഖം നോക്കാത്ത നടപടിയാണ് ജനം ആഗ്രഹിക്കുന്നത്... ചില കൊലപാതകക്കേസിലെ പ്രതികള്‍ ആഭ്യന്തരമന്ത്രിക്ക് തലപ്പാവ് അണിയിക്കുമ്പോള്‍;  നമ്മള്‍ ഭരിക്കുമ്പോള്‍ നമുക്ക് കൊല്ലാം എന്നൊരു ദു:സൂചന കടന്നുവരുന്നു... ശാശ്വത സമാധാനമല്ലെ ഈ വരവിന്‍റെ ഉദേശ്യം അല്ലായെങ്കില്‍  ചോരയില്‍ മുക്കിയ തലപ്പാവിനേക്കാള്‍ മഹാത്മയുടെ  ഊന്നുവടിയും ഘടികാരവുമാണ് നാടിനാവശ്യം...

Saturday, September 27, 2014

സര്‍വ്വലോക അഴിമതിക്കാരെ സംഘടിക്കുവിന്‍


       സര്‍വ്വലോക അഴിമതിക്കാരെ സംഘടിക്കുവിന്‍, നിങ്ങളിലൊന്നിനെയിന്നിതാ ജയിലില്‍ പൂട്ടിയിരിക്കുന്നു.. ഈ മുദ്രാവാക്യം പണ്ട് ശിലായുഗ അഴിമതിസംഭരണസമിതിയുടെ വിമോചന മുദ്രാവാക്യമായിരുന്നുവെന്നു പറയപ്പെടുന്നു. അഴിമതിയെന്നത് അവകാശമായി കരുതിയിരുന്ന കാലത്ത് ഒരു അഴിമതിനേതാവിനെ കോടതി പിടിച്ചപ്പോള്‍ രൂപംകൊണ്ട ഒരു മുദ്രവക്യമാണിത്... അഴിമതി നേതാവ് അഴിക്കകത്തായാല്‍ അണികള്‍ അഴിഞ്ഞാടണം അതാണ്‌ അതിന്‍റെ ഒരു രീതി.. പൊതുമുതല്‍ നശിപ്പിക്കുക, വാഹനങ്ങള്‍ തകര്‍ക്കുക, കടകള്‍ കൊള്ളയടിക്കുക, വൈദ്യുതി തടസപ്പെടുത്തുക, അന്യന്‍റെ പറമ്പിലെ തെങ്ങില്‍ കയറി കരിക്കിട്ട് കുടിക്കുക, അയല്‍ക്കാരന്‍റെ മുറ്റത്ത്‌ അപ്പിയിടുക, തടത്തില്‍ നില്‍ക്കുന്ന വാഴക്കുല വെട്ടുക, കിണറ്റില്‍ മണ്ണെണ്ണ ഒഴിക്കുക തുടങ്ങിയ പരിപാടികളും തുടര്‍ന്നു നടത്താം... ആ ദിവസത്തെ ഇമ്മാതിരി കലാപ പരിപാടികള്‍ക്കെതിരെ ആരും മിണ്ടില്ല.. അത് പ്രതിഷേധമല്ലേ പ്രതിഷേധം.... വ്യാപകവും, പരക്കെയും ,ഇടതടവില്ലാതെയും ആക്രമണം നടത്തിയാണ് അണികള്‍ അഴിമതിക്കാരായ നേതാക്കള്‍ക്ക് പിന്തുണ കൊടുക്കുന്നത്... നേരെചൊവ്വേ പറഞ്ഞാല്‍  നേതാവ് മാത്രമല്ല സമൂഹ്യദ്രോഹികളായ അണികളും അഴിയെണ്ണേണ്ടവര്‍ തന്നെയാണ്...
  ഇനി കാര്യത്തിലേക്ക് വരാം. നമ്മുടെ അയല്‍ക്കാരി  അമ്മച്ചി ഏതാണ്ട് ചില്ലറ കോടി കട്ടതിനു കോടതി ശിക്ഷിച്ചുവെന്ന കാര്യത്തില്‍ അയല്പക്ക രാജ്യത്ത് പരക്കെ അക്രമം നടക്കുന്നു..  അഞ്ചുവര്‍ഷം കൊണ്ട് അറുപത്തിയഞ്ചു കോടി സമ്പാദിച്ചുവെന്ന നിസ്സാരകാര്യത്തിനു കോടതി നാലുവര്‍ഷം തടവും നൂറുകോടി പിഴയും വിധിച്ചിരിക്കുന്നു... എവിടുന്നു എടുത്തു കൊടുക്കാനാണ്. അറുപത്തിയഞ്ചു കോടി ഉണ്ടാക്കിയതിനു; നൂറു കോടി പിഴ; ഇതു എന്തു കോപ്പിലെ ന്യായമാണ്. ഉണ്ടാക്കിയ അറുപത്തിയഞ്ചുകോടിയും ബാക്കിവരുന്ന മുപ്പത്തിയഞ്ചുകോടിയും ചേര്‍ത്ത് നൂറുകോടി പിഴ അടയ്ക്കണമെങ്കില്‍ ഇനിയും മൂന്നു വര്‍ഷമെങ്കിലും  ഭരിക്കാന്‍ കിട്ടണം. എങ്കിലേ കണക്ക് ശരിയാകൂ.. അല്ലെങ്കില്‍ നൂറുകോടി എന്നത് ‘നൂറുകൊടി’ എന്നാക്കി മാറ്റണം..  ഈ ശരികേടില്‍  പ്രതിഷേധിച്ചാണ് അണികള്‍ ബഹളം വയ്ക്കുന്നത്...
 91-96 ലെ ആദ്യ ഭരണത്തില്‍ രണ്ടായിരം ഏക്കര്‍ ഭൂമിയടക്കം അറുപത്തിയഞ്ചുകോടി രൂപയുടെ സമ്പാദ്യം ഉണ്ടാക്കിയതിനാണ് ഈ  കേസ് ഉണ്ടായത്... ഇന്നത്തെ കോടികള്‍ ഇതില്‍പ്പെടുന്നില്ല.. 800കിലോഗ്രാം വെള്ളി ,28കിലോഗ്രാം സ്വര്‍ണ്ണം ,750ജോഡി ചെരുപ്പ് ,10500സാരി, 91വാച്ച് ഇവയൊക്കെ കേസിലെ തൊണ്ടി മുതലായി പറയപ്പെടുന്നു... ഏതായാലും സംഗതി അമ്മച്ചിക്ക് പണിയായി. ഇതൊക്കെ അനധികൃത സമ്പാദ്യമാണ് പോലും...

 കളവ് നടത്തിയ കാര്യത്തില്‍ ഒരു കള്ളനെ കോടതി ശിക്ഷിച്ചാല്‍ അതില്‍ നാട്ടുകാര്‍ക്ക് എന്താണ് പ്രശ്നം... ഒരു പ്രശ്നവുമില്ല.. പിന്നെ ആര്‍ക്കാണ് പ്രശ്നം..? കള്ളന്‍റെ ശിങ്കിടികള്‍ക്ക്; അല്ലാതാര്‍ക്ക്.... ആയമ്മ സാരി വാങ്ങിയും ചെരുപ്പു വാങ്ങിയും ഖജനാവിലെ കാശു മുഴുവന്‍ ധൂര്‍ത്തടിച്ചിട്ടും ഈ കുരുപ്പകള്‍ എന്തേ ഇങ്ങനെ ബഹളം കൂട്ടുന്നു.. അഴിമതി കേസില്‍ അമ്മച്ചി അകത്തായത്തോടെ കുരുപ്പകള്‍ ഒന്നാകെ റോഡിലിറങ്ങുന്നു, വണ്ടി കത്തിക്കുന്നു, കൊള്ള നടത്തുന്നു, വൈദ്യതി വിശ്ച്ച്ചെദിക്കുന്നു.. കേസ് കൊടുത്തവന്‍റെ വീടിനു കല്ലെറിയുന്നു ,വനിതാ കുരുപ്പകള്‍ നെഞ്ചത്തടിച്ചു നിലവിളിക്കുന്നു... അമ്മച്ചിയുടെ ആജന്മ വൈരിയും നേരെനില്ക്കാന്‍പ്പോലും ആക്കമില്ലാത്തതുമായ അപ്പാപ്പന്‍റെ വീട്ടിലേക്ക് പ്രകടനം നടത്തുന്നു.. ഇങ്ങനെയാവണം അണികള്‍;;;;; തൂറിയവനെ ചുമന്ന്` സ്വയം നാറുന്ന അണികള്‍... പണ്ടൊരു ആശാന്‍ കാലിത്തീറ്റ കട്ടുതിന്ന കേസില്‍ അറസ്റ്റു ചെയ്യാന്‍ പട്ടാളത്തെ വിളിക്കേണ്ടിവന്ന രാജ്യമാണ് ഇതിലപ്പുറവും നടന്നാല്‍ അത്ഭുതപ്പെടാനില്ല... ഇതാണ് നെഹ്രൂജി പറഞ്ഞ ആ നാനാത്വത്തിലെ ഏകത്വം..
 ഈ കോടതി വിധിയിലൂടെ ദൈവം ഉണ്ടെന്ന് ഉറപ്പാക്കാന്‍ ഇതാ ഒരു തെളിവുകൂടി കിട്ടിയിരിക്കുന്നു... പരിണാമസിദ്ധാന്തവും പൊക്കിപ്പിടിച്ച് നടക്കുന്ന നിരീശ്വരവാദികള്‍ ഇനിയെങ്കിലും ചുവടുമാറ്റണം.. മുല്ലപ്പെരിയാറില്‍ കേരളത്തിന്‍റെ വെള്ളംകുടി മുട്ടിച്ച ജയാമ്മ അങ്ങനെ അകത്തായില്ലേ... മുല്ലപ്പെരിയാറിനെക്കുറിച്ചുള്ള എല്ലാ പരീക്ഷയിലും തോറ്റുതുന്നം പാടി, ഒടുക്കം സുപ്രീംകോടതിയില്‍ നിന്നുവരെ തല്ലുവാങ്ങിയ കേരളസര്‍ക്കാര്‍ ഉളുപ്പില്ലാതെ വെളുക്കെ ചിരിച്ചപ്പോള്‍... അണക്കെട്ടു പൊട്ടിയാല്‍ ഇഹലോകവാസം വെടിയേണ്ടിവരുന്ന പാവപ്പെട്ട ജനം  എല്ലാം പ്രധാന ക്ഷേത്രങ്ങളിലും  മുല്ലപ്പെരിയാറിനു വേണ്ടി തുലാഭാരം നടത്തി ,എല്ലാ പള്ളികളിലും മെഴുകുതിരി കത്തിച്ചു.. കൂട്ടനിസ്ക്കാരങ്ങള്‍ നടത്തി... ശത്രു സംഹാരപൂജകളും, വെടിവഴിപാടുകളും ആവോളം നടത്തി . ഒന്നും പാഴായില്ല.   ഒടുവില്‍ എന്തായി,,,,,,,അമാവാസി ചതിച്ചു; ജയലളിത അകത്തായി.... ലതാണ് കാര്യം.. കേരളത്തിന്‍റെ പ്രക്കാണ് ജയലളിതയ്ക്ക് കെണിയായത്‌.. അണക്കെട്ടിങ്ങു വിട്ടുതന്നാല്‍ ജാമ്യം ഉറപ്പ്..  

 പൊതുഖജനാവിലും,`ജനകീയ പദ്ധതികളിലും കയ്യിട്ടുവാരി കൊള്ളനടത്തി സ്വന്തം അരക്കെട്ടുവീര്‍പ്പിക്കുന്ന അലവലാതികള്‍ക്ക് ഒരുളുപ്പും കൂടാതെ ജയ്‌ വിളിക്കുന്ന പേക്കോലങ്ങളാണ് ഈ നാടിന്‍റെ ശാപം.. പെരുംകള്ളന്‍റെ മേശയില്‍നിന്നും വീഴുന്ന ഉച്ചിഷ്ടങ്ങള്‍ ആവോളം നക്കിത്തിന്നശേഷം ആസനത്തിലെക്ക് തിരുകിയ വാല് ആകാശത്തിലേക്ക് വളച്ചുകൊണ്ട് ഓരിയിട്ടു നിരത്തിലിറങ്ങുന്ന അണികളെന്ന സമൂഹ്യദ്രോഹികള്‍ സമാധാനം ജീവിതം ആഗ്രഹിക്കുന്ന സാധരണക്കാരനെയാണ് ബുദ്ധിമുട്ടിലാക്കുന്നത്.. അവശ്യസര്‍വ്വിസുകളും അവശ്യവസ്തുക്കളുടെ വിതരണവും ഈ അരാജകവാദികള്‍ തടയുന്നു.. ആര്‍ക്കുവേണ്ടി..? എന്തിനുവേണ്ടി..??. പൊതുജനത്തിന്‍റെ ചോരകുടിച്ചുവീര്‍ക്കുന്ന  നേതാവിന്‍റെ അമേദ്യവും ഉച്ചിഷ്ടവും അമൃതായി കരുതുന്ന അക്ഷരജ്ഞാനമില്ലാത്ത അലവലാതി അനുയായികളുള്ള കാലത്തോളും അഴിമതിരഹിത ഇന്ത്യ നമുക്കൊരു സ്വപ്നമായിത്തന്നെ തുടരും....