വാര്‍ത്തുള ചലനം വക്രരീതിയില്‍

       

വിദ്യാധരന്‍റെ വ്യാകുലചിന്തകള്‍

     സരസൂ)))))))))))))))))))) ....

<  ങഹാ...... നിങ്ങള്‍ ഇത്രവേഗം തിരിച്ചെത്തിയോ ...

പ്രധാനമന്ത്രിയെ കാണണം, നിവേദനം കൊടുക്കണം എന്നൊക്കെ പറഞ്ഞിട്ടാണല്ലോ രാവിലെ ഇറങ്ങിയത് ,,,കണ്ടില്ലേ...?????

എന്നാ... വായനശാലക്കമ്മിറ്റിക്കാര്‍ ആരും വന്നില്ലേ..????

>വന്നു വന്നു... പോകുകയും ചെയ്തു.കാര്യങ്ങളൊക്കെ വിശദമായിട്ട് പറയാം നീയാ വാതിലങ്ങു അടച്ചേരേ ...

<അയ്യോ നിങ്ങള്‍ക്കിത് എന്നാ പറ്റി... എന്തോ വയ്യാണ്ടായതുപോലെ....

>നീ ഒച്ചവെച്ചുനാട്ടുകാരെ മുഴുവന്‍ അറിയിക്കല്ലേ ..പോയി ഇച്ചിരെ വെള്ളം ചൂടാക്ക്‌ ..ആ കൊട്ടന്‍ച്ചുക്കാധി തൈലം എവിടാ ഇരിക്കുന്നത്.

<ദൈവമേ ഇതെന്നാ  പുറത്തൊക്കെ മുഴുവന്‍ പാടാണല്ലോ. ഷര്‍ട്ട്‌ കീറിയിട്ടുമുണ്ട്. പോയവഴിക്ക് വല്ലതും പറ്റിയോ....

>ഒക്കെ പറയാം ..നീ ആദ്യം ഈ കുഴമ്പോന്നു പുറത്തോട്ടു പുരട്ട്... അയ്യോ......അമ്മേ..... അമര്‍ത്തല്ലേ പതുക്കേ ...

<എന്നാ പറ്റിയെ...?? ആ ഉല്പ്പലാക്ഷനും കൂട്ടരും എന്തിയേ ....

>എടി.... എല്ലാം പറയാം

പ്രധാനമന്ത്രിയ്ക്ക് കൊടുക്കേണ്ട നിവേദനവും ഒപ്പുകളുമൊക്കെയായി ഞങ്ങള്‍ രാവിലെതന്നെ കൊച്ചിയില്‍ എത്തി.നമ്മുടെ അന്തപ്പന്‍റെ ഗുഡ്സ് ഓട്ടോറിക്ഷ മീനെടുക്കാന്‍ പോകുന്നുണ്ടായിരുന്നു. അതുകൊണ്ട് വണ്ടിക്കൂലിയും ലാഭിച്ച് സ്ഥലത്തെത്തി. ഒരു വിധത്തിലാ... സ്റ്റേജിന്റെ മുന്നില്‍ സീറ്റ്‌ ഒപ്പിച്ചത്. പത്തു മണിയായപ്പോള്‍ നമ്മുടെ ആശാന്‍ വന്നു പരിപാടിയും ഉല്‍ഘാടിച്ചു. വന്നപാടെ പതിവ്‌ പരിപാടി തുടങ്ങി. വില കൂട്ടണം, വില കൂട്ടണം ഇതുതന്നെ പറച്ചില്‍. എണ്ണവില ഇനിയും കൂട്ടണം, ലോകത്ത്‌ ഏറ്റവും കുറവ്‌ ഇവിടെയാണ്‌, അതിന്‍റെ നാണക്കേട് നമ്മള്‍ക്കാണ്, അതുമാറ്റണം, വിലകൂട്ടി നമ്മള്‍ അന്തസ് ഉയര്‍ത്തണം എന്നാലെ രാജ്യം പുരോഗമിക്കു തുടങ്ങിയ പതിവ്‌ വളിപ്പുകള്‍ ഉളിപ്പില്ലാതെ വിളിച്ചു പറഞ്ഞു കൊണ്ടിരുന്നു. കേട്ടാല്‍ ഏതു ശരാശരി കേരളിയനും ചൊറിച്ചില്‍ വരുന്ന പ്രസംഗം..ഇതു പറയാനാണോ ഈ പണ്ടാരത്തെ ഇപ്പോള്‍ ഇങ്ങോട്ട് കെട്ടിയെടുത്തതെന്ന് മനസ്സില്‍ പറഞ്ഞുകൊണ്ടിരുന്നപ്പോളാണ് ..നമ്മുടെ നളിനാക്ഷന്‍ മാഷ്‌ ചാടിയെഴുന്നേറ്റ് പ്രധാനമന്ത്രി ഗോബാക്ക് എന്നൊരു പറച്ചില്‍ ..പോരെ പൂരം ..ആകപ്പാടെ ബഹളം..ചെറുതായി മഴയും ചാറാന്‍ തുടങ്ങി. ആരോ കുട നിവര്‍ത്തി. പോലിസ്‌ വിചാരിച്ചു; കരിങ്കൊടി കാട്ടുകയാണെന്ന്. എന്‍റെ സരസൂ...... പിന്നെ അവിടെ നടന്നതൊന്നും പറയാന്‍ പറ്റില്ല..ഇരിയടാ, നിക്കെടാ, ഓടെടാ ,പിടിയവനെ തുടങ്ങിയ ശബ്ദങ്ങളാണ് പിന്നീട് കേട്ടത്. ഉന്തുംതള്ളും, പോലിസിന്‍റെ ആക്രോശവും.... എല്ലാവരും നാലുവഴിക്കു ഓടി.. ഓടുന്നതിനിടയില്‍ അടിയും കിട്ടി...ഞാന്‍ പിന്നെ ഗ്രൌണ്ടിന്റെ തെക്കുവശത്തെ മതിലുചാടി ഓടി.. നിനക്കറിയില്ലേ പണ്ട് നമ്മള്‍  ഫ്ളവര്‍ഷോ കാണാന്‍പോയ ഗ്രൌണ്ട്...

<      ങ്ങാ....

 >     ങ അതു തന്നെ.......

<നിങ്ങള് അത്രയും പൊക്കമുള്ള മതില്‍ ചാടിയോ....

>ങ്ങഹാ..... അങ്ങനെ സംഭവിച്ചു...ഓടുന്നതിനിടയില്‍ തിരിഞ്ഞുനോക്കുമ്പോള്‍ പിറകെ രണ്ടു പോലീസുകാര്‍. പിടുത്തം വീണാല്‍ അവന്മാരെന്റെ പരിപ്പെടുക്കും ..ജീവന്‍ രക്ഷിക്കാനുള്ള വ്യഗ്രതയില്‍ ചിറകുകള്‍ മുളച്ച എനിക്ക് മതിലൊന്നും ഒരു തടസമേ... ആയില്ലസരസൂ.  അയ്യോ.... പതുക്കെ തിരുമ്മു ; നീറുന്നു...

<ഉല്പലാക്ഷനും, നളിനാക്ഷന്‍ മാഷുമൊക്കെ രക്ഷപെട്ടോ...

>നളിനാക്ഷനെ കയ്യോടെ പോലീസ് പിടിച്ചു.ജൂബായും, തുണി സഞ്ചിയുമൊക്കെ കീറിപ്പറിഞ്ഞ് ഓടുന്നത് കണ്ടു.മവോയ്സ്റ്റാണെന്ന് പറഞ്ഞാ പിടിച്ചിരിക്കുന്നത്. ജീവനോടെ പുറത്തുവന്നാല്‍ ഭാഗ്യം..

ഉല്പ്പലാക്ഷനും ഞാനും ഒന്നിച്ചാ ഓടിയത്.പക്ഷെ അവന്‍റെ മുണ്ട് ഓടുന്നവഴിയില്‍ ഒരു കമ്പേല്‍ ഉടക്കി. മുണ്ട് അരയ്ക്കുകെട്ടി വച്ചതിനാല്‍ പറിച്ചെറിഞ്ഞ് ഓടാനും പറ്റിയില്ല. അതുകൊണ്ട് പോലിസ്‌ പിടിച്ചു. പിറകില്‍ നിന്ന് ഇടിയുടെ ശബ്ദവും, കരച്ചിലുമൊക്കെ കേട്ടു.പക്ഷെ രക്ഷിക്കാന്‍ നിന്നാല്‍ ഞാനും കുടുങ്ങും അതുകൊണ്ട് ഞാന്‍ തടിയെടുത്തു. അവനോട് ഞാന്‍ അന്നേ പറഞ്ഞതാ.... ഒരു വഴിക്ക് പോകുമ്പോള്‍ മുണ്ട് ഉടുക്കരുതെന്ന്. അപ്പൊ അത് കേരളത്തിന്‍റെ തനത് വസ്ത്രമാണെന്നും,ഖാദിയെ രക്ഷിക്കണമെന്നും വീമ്പടിച്ചു.ഇപ്പൊ അനുഭവിക്കട്ടെ...

<നമ്മുടെ എം.എല്‍.എ യും, പഞ്ചായത്ത് പ്രസിഡണ്ടുമൊക്കെ ഉണ്ടായിരുന്നില്ലേ ..??

>അതുകൊണ്ട് കാര്യം വല്ലതുമുണ്ടോ?? അവന്മ്മാര്‍ സ്റ്റേജിലും അതിന്‍റെ പിറകിലുമായി ചുറ്റിപ്പറ്റി നില്‍ക്കത്തെയൊള്ളൂ.. അടി വീണപ്പോള്‍ അന്നേരെ മുങ്ങി....

ഇതിപ്പോ എന്നാ ചെയ്യാനാ.... ആരോടാ പറയുക ...മനുഷ്യനിവിടെ നട്ടംതിരിയുന്ന സമയമാ .. സമരങ്ങളായ സമരങ്ങള്, ഒരു കാര്യവും നേരെ ചൊവ്വേ നടക്കുന്നില്ല. ഭക്ഷണസാധനങ്ങളുടെ വിലയാണെങ്കില്‍ മൂന്നിരട്ടിയിലധികമാ കൂടിയിരിക്കുന്നത്.കറണ്ടാണെങ്കില്‍ ഒരാഴ്ചത്തെയ്ക്കുള്ള വെള്ളംമാത്രമാണ് അണക്കെട്ടിലുള്ളതെന്ന് മന്ത്രി. ഇങ്ങനെ സാധാരണക്കാരന്‍റെ ജീവിതം ഇരുട്ടില്‍നിന്ന് ഇരുട്ടിലേക്ക് നീങ്ങുമ്പോള്‍ എന്തെങ്കിലും കുറച്ചു ഇളവുകള്‍ പ്രഖ്യാപിക്കുമെന്ന് പ്രതീക്ഷിച്ചുകൊണ്ടാണ് പ്രധാനമന്ത്രിയുടെ വരവിനെ ജനം കാണുന്നത്. അപ്പോള്‍ ഏരിതീയ്യില്‍ എണ്ണ ഒഴിക്കുന്നത് പോലെ എണ്ണവില ഇനിയുംകൂട്ടണം, സബ്സീഡി എടുത്തുകളയണം തുടങ്ങിയ തുഗ്ലക് പരിഷ്ക്കാരങ്ങള്‍ പ്രസംഗിച്ചാല്‍ ആരാണ് ഗോബാക്ക് വിളിക്കാതിരിക്കുന്നത്. ഇതെല്ലം കേട്ടുകൊണ്ട് നമ്മുടെ മുഖ്യനും കൂട്ടരും പതിവ്‌ ശൈലിയില്‍ വേദിയിലിരുന്നുറങ്ങുന്നുണ്ടായിരുന്നു. പ്രസംഗം മനസിലാകാത്തതുകൊണ്ടോ എന്തോ.. പൂച്ച പാലുകുടിക്കുന്ന രീതിയില്‍ എല്ലാം കേട്ടു നിവൃതിയടഞ്ഞു. ഇവിടുത്തെ പട്ടിണിയും വിലക്കയറ്റവും കുറയ്ക്കാന്‍ ഭക്ഷ്യധാന്യവിഹിതം കൂട്ടി നല്‍കണമെന്നോ,കേന്ദ്രപൂളില്‍ നിന്ന് കുറച്ചു വൈദ്യുതി തരണമെന്നൊ, ജീവനക്കാരുടെ സമരംതീര്‍ക്കാന്‍ കുറച്ചു പണംതന്നു സഹായിക്കണമെന്നൊ ആവശ്യപ്പെടാന്‍ ആരും മിനക്കെട്ടുകണ്ടില്ല....അല്ല എന്തിനാ ഇതൊക്കെ ചോദിച്ചു സമയം കളയുന്നത്.പത്തു പൈസാപോലും കിട്ടില്ല.അവിടേം നമ്മള്‍ ഇവിടേം നമ്മള്‍ ...അതുകൊണ്ട് വിശേഷിച്ച് കാര്യമൊന്നും ഇല്ലായെന്നതു വേറെകാര്യം. ഇതൊന്നും ഇല്ലെങ്കിലും നമ്മുക്കെന്നാ ഒരു കുറവ്‌?? കരന്റില്ലാതെ ജനം വലയുമ്പോള്‍ നട്ടാപ്പകലും എല്ലാ ലൈറ്റും തെളിച്ചിട്ടല്ലേ നമ്മള്‍ ജീവിക്കുന്നത്. ജനം കഞ്ഞികുടിച്ചാലെന്ത്; കുടിച്ചില്ലെങ്കിലെന്ത്; നമ്മടെ കഞ്ഞികുടി മുട്ടില്ലല്ലോ. എണ്ണവില കൂടിയാലെന്ത്; നമുക്കിതുവല്ലോം അറിയണോ?? എല്ലാം ഓസിലല്ലേ....ചുമ്മാ അങ്ങ് ഭരിക്കുക. അത്രതന്നെ... കാട്ടിലെ തടി; തേവരുടെ ആന... വലിയെടാ വലി .................